ທ່ານ ຄອນສະຫວັນ ໄຊຍະເສນ ເລີ່ມເຮັດວຽກກັບບໍລິສັດ ຟໍເຕ ລາວ ໃນຕໍາແໜ່ງຜູ້ຈັດການທົ່ວໄປ ແຕ່ວັນທີ 15 ກໍລະກົດ 2024. ທ່ານເປັນຜູ້ຊີ້ນໍາວຽກງານການພັດທະນາແຜນຍຸດທະສາດທຸລະກິດ ແລະ ມີບົດບາດສໍາຄັນໃນການກໍານົດທິດທາງຄວາມສໍາເລັດຂອງບໍລິສັດ. ທ່ານ ຄອນສະຫວັນ ຈະເຮັດວຽກຢ່າງໃກ້ຊິດ ກັບຜູ້ອໍານວຍການໃຫຍ່ຂອງກຸ່ມບໍລິສັດ ຟໍເຕ, ຜູ້ອໍານວຍການໃຫຍ່ ແລະ ຄະນະບໍລິຫານງານຂອງບໍລິສັດ ຟໍເຕ ລາວ ເພື່ອຂັບເຄື່ອນທຸລະກິດໃນແຕ່ລະດ້ານ ເປັນຕົ້ນແມ່ນ ວຽກງານທົດແທນສິນປະກັນໄພ, ການອອກສັນຍາປະກັນໄພ, ວຽກງານບັນຊີ-ການເງິນ, ການບໍລິຫານບຸກຄະລາກອນ ແລະ ຫ້ອງການ, ການບໍລິການລູກຄ້າ, ໄອທີ, ວຽກງານການຂາຍ ແລະ ການພັດທະນາຜະລິດຕະພັນ ປະກັນໄພ. ກ່ອນທີ່ຈະມາຮ່ວມງານກັບບໍລິສັດ ຟໍເຕ ລາວ, ທ່ານ ຄອນສະຫວັນ ເຄີຍດໍາລົງຕໍາແໜ່ງເປັນຫົວໜ້າພະເເນກບັນຊີ-ການເງິນ ແລະ ຜູ້ບໍລິຫານຄວາມສ່ຽງ ຢູ່ບໍລິສັດ ອາລິອັນສ໌ ປະກັນໄພລາວ ຈໍາກັດ. ເພີ່ນເປັນຜູ້ທີ່ມີຄວາມຊໍານານໃນວຽກງານການລາຍງານການເງິນ ແລະ ການວາງແຜນຍຸດທະສາດ ເຊິ່ງເຮັດໃຫ້ບໍລິສັດມີຜົນກໍາໄລທີ່ດີ. ທ່ານ ຄອນສະຫວັນ ຍັງມີຄວາມຊ່ຽວຊານດ້ານການປະເມີນຄວາມສ່ຽງເຊີງຍຸດທະສາດ, ການຈັດຕັ້ງປະຕິບັດ ແລະ ພັດທະນາວຽກງານການບໍລິຫານຄວາມສ່ຽງ ເພື່ອຮັບປະກັນຫລຸດຜ່ອນຄວາມສ່ຽງ ແລະ ຄວາມຕໍ່ເນື່ອງໃນການດຳເນີນທຸລະກິດ ແລະ ການເຕີບໂຕຂອງບໍລິສັດ. ນອກຈາກນີ້, ເພີ່ນຍັງເປັນໜື່ງໃນຜູ້ຊີ້ນຳໆພາກ່ຽວກັບການຊື້ສັນຍາສຳປະທານຕືກຂອງທະນາຄານ ມາເປັນຂອງບໍລິສັດ ອີກດ້ວຍ. ກ່ອນໜ້ານີ້, ທ່ານ ຄອນສະຫວັນ ເຄີຍດຳລົງຕຳເເໜ່ງເປັນ ຜູ້ອໍານວຍການຝ່າຍ ຊີ້ນໍາວຽກງານດ້ານ ບັນຊີ-ການເງິນ ແລະ ເປັນຜູ້ຊີ້ນໍາໆພາໃນການພັດທະນາລະບົບການປະກັນໄພ ແລະ ການວາງຫລັການ ເເລະ ລະບຽບການໃນການດໍາເນີນທຸລະກິດປະກັນໄພ ໃຫ້ກັບບໍລິສັດປະກັນໄພ ທີ່ຖືກສ້າງຕັ້ງຂື້ນໃໝ່. ທ່ານ ຄອນສະຫວັນ ສໍາເລັດການສຶກສາລະດັບປະລິນຍາຕີ ຈາກຄະນະນິຕິສາດ ແລະ ລັດຖະສາດ, ມະຫາວິທະຍາໄລແຫ່ງຊາດລາວ ແລະ ປະລິນຍາຕີ ສາຂາບໍລິຫານທຸລະກິດ ຈາກວິທະຍາໄລພາສາອັງກິດ ແລະ ທຸລະກິດ. ເພີ່ນຍັງໄດ້ສໍາເລັດການສຶກສາລະດັບປະລິນຍາໂທ ສາຂາບໍລິຫານທຸລະກິດຈາກ ສະຖາບັນການເມືອງ ເເລະ ການປົກຄອງແຫ່ງຊາດ ແລະ ປະລິນຍາໂທ ສາຂາການບໍລິຫານໂຄງການ ຈາກໂຮງຮຽນທຸລະກິດ (SKEMA, Business School), ປະເທດ ຝຣັ່ງ.

ທ່ານ ຮີໂຣກິ ໂອກະໂມະໂຕະ (ໂອກະ), ຮອງຜູ້ອໍານວຍການ ຊີ້ນໍາວຽກງານທຸລະກິດ ຂອງບໍລິສັດ ຟໍເຕ ລາວ ແລະ ເປັນຫົວໜ້າທຸລະກິດປະຈໍາພາກດ້ານການຂາຍຂະແໜງທຸລະກິດຍີ່ປຸ່ນ ໃນປະເທດກໍາປູເຈຍ. ທ່ານ ຮີໂຣກິ ເຂົ້າຮ່ວມກຸ່ມບໍລິສັດ ຟໍເຕ ໃນປີ 2018 ແລະ ໄດ້ຍ້າຍມາປະຈໍາ ຢູ່ ສປປ ລາວ ພາຍຫຼັງທີ່ ຟໍເຕ ເຂົ້າຊື້ກິດຈະການຂອງ ບໍລິສັດ ໂຕໂກຈາຢາ ລາວ ປະກັນໄພ ໃນອະດີດ. ທ່ານ ຮີໂຣກິ ໄດ້ສ້າງຕັ້ງທີມງານການຂາຍຂະແໜງທຸລະກິດຍີ່ປຸ່ນ ຢູ່ທີ່ກຸ່ມບໍລິສັດ ຟໍເຕ ແລະ ກາຍເປັນຜູ້ຊ່ຽວຊານດ້ານການປະກັນໄພທີ່ປະຈໍາການຄົນທໍາອິດ ໃນຂະແໜງທຸລະກິດລູກຄ້າຍີ່ປຸ່ນ ຂອງປະກັນໄພທົ່ວໄປໃນ ສປປ ລາວ. ພາຍໃນ 4 ປີຂອງການດໍາເນີນງານ, ທ່ານ ຮີໂຣກິ ໄດ້ປະສົບຜົນສໍາເລັດໃນການຂະຫຍາຍຕົວຂອງທຸລະກິດ ເພື່ອບັນລຸສ່ວນແບ່ງທາງການຕະຫຼາດອັນດັບຕົ້ນຂອງຕະຫຼາດປະກັນໄພຍີ່ປຸ່ນໃນ ສປປ ລາວ. ທ່ານ ຮີໂຣກິ ເລີ່ມຕົ້ນເຮັດວຽກທໍາອິດຢູ່ທີ່ ທະນາຄານໂຕກຽວ Mitsubishi UFJ Co., Ltd ໃນປີ 2010. ທ່ານ ຮີໂຣກິ ໄດ້ຮັບປະສົບການຢ່າງກວ້າງຂວາງໃນຂະແໜງທະນາຄານ ສໍາລັບບໍລິສັດຈົດທະບຽນຕະຫຼາດຫຼັກຊັບ, ໂດຍສະເພາະແມ່ນການສະໜອງທຶນຂອງໂຄງການ, ເງິນກູ້ຢືມ, ແລະ ການເງິນສໍາລັບການຄວບທຸລະກິດ ແລະ ການຊື້-ຂາຍກິດຈະການ ໂດຍເປັນ ຜູ້ຈັດການຝ່າຍພົວພັນທຸລະກິດ. ທ່ານ ຮີໂຣກິ ຈົບການສຶກສາລະດັບປະລິນຍາຕີດ້ານປະຫວັດສາດ - ສາຂາວິຊາປະຫວັດສາດໃນອາຟຣິກາ - ທີ່ມະຫາວິທະຍາໄລຄາລິຟໍເນຍ, ລອສແອງເຈລິສ (UCLA), ສະຫະລັດອາເມລິກາ.